திருப்பூரில் ரேஷன் கடையில் அரிசி மூட்டைகள் சரிந்து விழுந்து சிறுவன் பலி

திருப்பூரில் தமிழக அரசின் பொங்கல் பரிசை வாங்க தாயுடன் ரேஷன் கடைக்கு சென்ற சிறுவன் மீது அரிசி மூட்டைகள் சரிந்து விழுந்ததில், சம்பவ இடத்திலேயே அச்சிறுவன் உயிரிழந்தான்.

திருப்பூர் பெருமாள்நல்லூர் பகுதியில் உள்ள எஸ்.எஸ். நகர் ரேஷன் கடையில் பொங்கல் பரிசு இன்று வினியோகம் செய்யப்பட்டு வருகிறது.

பொங்கல் பரிசை பெவதற்காக அப்பகுதியைச் சேர்ந்த அஞ்சலி என்பர் தனது 8 வயது மகன் மோவின் பிரபுவை அழைத்துக் கொண்டு ரேஷன் கடைக்குச் சென்றார்.

அஞ்சலி வரிசையில் காத்திருந்த போது, விளையாட்டுத்தனமாக சிறுவன் ரேஷன் கடைக்குள் புகுந்ததாக கூறப்படுகிறது.

ரேஷன் கடைக்குள் அடுக்கி வைக்கப்பட்டிருந்த மூட்டைகளை சிறுவன் இழுத்து விளையாடியதாகவும் தெரிகிறது. அப்போது எதிர்பாராதவிதமாக மூட்டை சரிந்து சிறுவன் மீது விழுந்தன.

இதில் சம்பவ இடத்திலேயே சிறுவன் உயிரிழந்தான். இந்த சம்பவம் தொடர்பாக பெருமாள்நல்லூர் போலீஸார் வழக்குப்பதிவு செய்து விசாரித்து வருகின்றனர். சிறுவனின் உடல் பிரேத பரிசோதனைக்காக திருப்பூர் அரசு மருத்துவமனையில் வைக்கப்பட்டுள்ளது.

-தேனி முருகேஸ்வரன்.  

திருப்பூர் : கடத்தப்பட்ட 10 சிறுமிகள் மீட்பு

       ஆந்திரா மற்றும் கர்நாடகாவில் இருந்து தமிழகத்திற்கு கடத்திவரப்பட்ட பத்து சிறுமிகளை காவல்துறையினர் மீட்டுள்ளனர்.

டெல்லியில் இருந்து ஆந்திரா, கர்நாடகா வழியாக திருப்பூர் வரும் வரும் லோக்மான்யா எக்ஸ்பிரஸ் ரயிலில், சிறுமிகள் பலர் கடத்தி கொண்டுவரப்படுவதாக திருப்பூர் காவல்துறையினருக்கு நேற்று ரகசிய தகவல் கிடைத்தது.

இதனையடுத்து, முன்கூட்டியே  ரயில் நிலையத்துக்கு சென்ற திருப்பூர் காவல்துறையினர், பத்து சிறுமிகளையும் மீட்டனர். அவர்களை கடத்தி வந்த ஒரு பெண் உள்ளிட்ட சிலரை கைது கைது செய்தனர்.

கர்நாடகா மற்றும ஆந்திர எல்லையை ஒட்டியுள்ள பாவகாடா என்ற கிராமத்தில் இருந்து அந்த சிறுமிகள் கடத்தி வரப்பட்டுள்ளனர். இதுகுறித்து தனியார் தொண்டு நிறுவனம் கொடுத்த தகவலினபேரில், பெங்களூர் காவல்துறையினர் கோவை காவல்துறை ஆணையருக்கு தகவல் அனுப்பினர்.

இதனையடுத்து, இந்த கடத்தல் கும்பல் பிடிப்பட்டுள்ளது. கடத்தி வரப்பட்ட சிறுமிகள், தனியார் தொண்டு நிறுவனத்திடம் ஒப்படைக்கப்பட்டனர். கைது செய்யப்பட்டவர்களிடம் காவலதுறையினர் தொடர்ந்து விசாரணை நடத்தி வருகின்றனர்.

இணைய செய்தியாளர்  -Er.மாதேஷ்

திருப்பூரில் அதிமுக கவுன்சிலர் மர்ம நபர்களால் வெட்டி படுகொலை

     திருப்பூரில் அதிமுக கவுன்சிலர் முத்து மர்ம நபர்களால் வெட்டி படுகொலை செய்யப்பட்டார்.

நேற்றிரவு கவுன்சிலர் அவரது குடும்பத்தினரை அருகிலுள்ள தோட்டத்து வீட்டில் விட்டு விட்டு வீடு வந்துள்ளார். இன்று அதிகாலை வழக்கமாக கவுன்சிலர் வீட்டிற்கு சென்று வருகை பதிவேட்டில் கையப்பமிட துப்புரவு தொழிலாளர்கள் வந்துள்ளனர். அப்போது, முத்து வெட்டுப்பட்டு இறந்து கிடப்பத்தை பார்த்து அருகில் இருந்தவர்களிடம் தெரிவித்துள்ளனர்.

இந்த சம்பவம் குறித்து திருப்பூர் வடக்கு காவல் நிலைய போலீசார் வழக்கு பதிவு செய்து விசாரித்து வருகின்றனர். கொலையில் ஈடுபட்டவர்களை கைது செய்ய போலீசார் தீவிர தேடுதல் வேட்டையில் ஈடுபட்டுள்ளனர்.

  -இணைய செய்தியாளர் - s.குருஜி

ஒரு பெண் கருவுற்றிருக்கும்போது.........?

     ஆரோக்கியமான குழந்தை பிறக்க குங்குமப்பூ உதவும் என்பது அழுத்தமான உண்மை !!

ஒரு பெண் கருவுற்றிருக்கும்போது, தனக்குப் பிறக்கப் போகும் குழந்தை சிவப்பாகவும், கொழுகொழுவென்றும் இருக்க வேண்டும் என்று ஆசைப்படுவது இயல்பே..

இதற்காக குங்குமப் பூவை பசும்பாலில் கலந்து அருந்துவார்கள். இது ஒரு சம்பிரதாயம்போல் அனைத்து இடங்களிலும் பின்பற்றப்பட்டு வருகிறது.

இருப்பினும் இந்த குங்குமப்பூ உண்மையிலேயே குழந்தைக்கு நல்ல நிறத்தையும் போஷாக்கையும் தருகிறதா என்ற கேள்வி அனைவர் மனதிலும் எழுவதுண்டு.

குங்குமப்பூவானது குழந்தைக்கு நிறத்தைக் கொடுக்கும் என்பதை அறிவியல் பூர்வமாக நிரூபிக்க முடியவில்லை. ஆனால் கருவுற்ற 5 மாதத்திலிருந்து 9வது மாதம் வரை குங்குமப் பூவை பாலில் கலந்து குடித்து வந்தால் தாயின் இரத்தம் சுத்தப்படுவதுடன் குழந்தைக்கு தேவையான சத்துக்களும் எளிதில் கிடைக்கும். இதனால் ஆரோக்கியமான குழந்தையைப் பெற்றெடுக்க குங்குமப்பூ உதவுகிறது. ஆரோக்கிய குழந்தைதான் அழகான குழந்தை என்பதை அறிந்த நம் முன்னோர்கள் குங்குமப்பூவை கருவுற்ற பெண்களுக்கு கொடுத்தார்கள்.

நலமான குழந்தையை பெற்றெடுக்க குங்குமப்பூ உதவுகிறது.

குங்குமப்பூவை ஞாழல்பூ, காஷ்மீரம் என்ற பெயர்களில் அழைக்கின்றனர்.

Tamil - Kungumapoo

English - Saffron

Malayalam - Kunguma Poo

Telugu - Kumkuma poova

Sanskrit - kumkuma

Botanical Name - Crocus sativus

இது குமராஸ் இனத்தைச் சேர்ந்த பூண்டின் பூக்களிலுள்ள மகரந்த தாள்களே ஆகும். செம் மஞ்சள் நிறத்துடன் காணப்படும். இதை நீரிலிட்டால் சிறிது நேரத்தில் நீர் முழுவதும் நிறம் மாறும். இந்த குங்குமப் பூவானது வடமேற்கு நாடுகளிலும் இந்தியாவில் காஷ்மீரத்திலும் பயிராகிறது. ஒருவித வாசனையோடு சிறிது மினுமினுப்பாய் தோன்றும்.


இரத்தம் சுத்தமடைய :-

குங்குமப் பூ இரத்தத்தை சுத்தமாக்கும் தன்மை கொண்டது. இதனால் கருவுற்ற பெண்களுக்கு 5 மாதம் முதல் 9 மாதம் வரை கொடுப்பார்கள். இரத்தச் சோகையைப் போக்கி குழந்தையும் தாயும் ஆரோக்கியத்துடன் இருக்கச் செய்யும். பிறக்கும் குழந்தை நல்ல நிறப்பொலிவுடன் பிறக்கும் என்பது சித்தர் கருத்து.

குங்குமப் பூவை வெற்றிலையோடு சேர்த்து சாப்பிட்டு வந்தாலும் அல்லது பாலிலிட்டுக் காய்ச்சி அருந்தினாலும் பிறக்கும் குழந்தை நல்ல ஆரோக்கியத்துடன் பிறக்கும். பிரசவத்தின்போது உண்டாகும் வலியைக் குறைத்து குழந்தையை சுகப்பிரசவமாக பெற்றெடுக்க குங்குமப்பூ உதவுகிறது.

பிரசவித்த தாய்மார்களுக்கு :-

பிரசவித்த தாய்மார்களுக்கு உண்டாகும் குருதியிழப்பை சரிகட்டவும், மயக்கத்தைப் போக்கி புத்துணர்வு கொடுக்கவும், இரத்த சோகை ஏற்படாமல் தடுக்கவும் தினமும் 1/2 கிராம் அளவு 1 டம்ளர் பாலில் கலந்து அருந்துதல் நல்லது.

நன்கு பசியைத் தூண்ட :-

குங்குமப் பூவை பாலில் இட்டு காய்ச்சி இரவு படுக்கைக்கு செல்லும்முன் அருந்தி வந்தால் ஜீரண சக்தி அதிகரித்து நன்கு பசியைக் கொடுக்கும்.

குங்குமப்பூவை பாலில் கலந்து அருந்திவந்தால் தாது விருத்தியாகும், வாய்ப்புண், வயிற்றுப்புண் குணமாகும், இரத்தம் சுத்தமாகும், இரத்தச்சோகை நீங்கும்.

கருவுற்ற பெண்களுக்கு சளி, இருமல் இருந்தால் அது குழந்தையின் நலத்திற்கு கேடு விளைவிக்கும். சளி இருமல் தாக்காமல் இருக்க குங்குமப்பூ சிறந்த மருந்தாகும்.

தரமான குங்குமப்பூ 1 கிராம் சுமார் ரூ.500/- க்கு விற்பனையாகிறது.

-இணைய செய்தியாளர் - ராஜா

மடத்துக்குளம் புதிய வட்டம்

         திருப்பூர் மாவட்டம், மடத்துக்குளம் வட்டத்திலுள்ள  குடிமங்கலம், பெத்தம்பட்டி உள்வட்டங்களை உடுமலைப்பேட்டை வட்டத்தில் சேர்த்தும் , மடத்துக்குளம் உள்வட்டத்திலுள்ள 8 கிராமங்களைப் பிரித்து துங்காவி என்ற உள்வட்டத்தை உருவாக்கி மடத்துக்குளம் வட்டத்தினை மக்களின் தேவைக்காக உருவாக்க மாண்புமிகு முதல்வர் அவர்கள் உத்தரவிட்டுள்ளார். இந்த வட்டத்திற்கென புதியதாக வருவாய் ஆய்வாளர் 1, உள்வட்ட அளவர் 1, உதவியாளர் 1, பதிவறை எழுத்தர் 1, ஆகிய 4 பணியிடங்கள் தோற்றுவிக்கப்படும். இதனால் தொடர் செலவினமாக ஆண்டொன்றுக்கு 9 லட்சத்து 98 ஆயிரத்து 724 ரூபாய் அரசுக்கு ஏற்படும்.

        திருப்பூர் மாவட்டம், உடுமலைப்பேட்டை வட்டத்தை இரண்டாக பிரித்து உடுமலைப்பேட்டை மற்றும் மடத்துக்குளம் ஆகிய இரண்டு வட்டங்கள் உருவாக்கப்பட்டு, உடுமலைப்பேட்டையை தலைமையிடமாக்க கொண்டு, உடுமலைப்பேட்டை வருவாய்  கோட்டம் உருவாக்கப்பட்டது. இந்த வருவாய் கோட்ட அலுவலகம் தற்பொழுது உடுமலைப்பேட்டை வட்டாட்சியர் அலுவலக வளாகத்தில் தற்காலிகமாக இயங்கிவருகிறது. இதர கோட்ட அளவிலான அலுவலகங்களை ஆங்காங்கே பல்வேறு இடங்களில் வாடகை கட்டங்களில் செயல்பட்டு வருகின்றன.

         வருவாய் கோட்டாட்சியர்அலுவலகம் மற்றும் வட்டாட்சியர் அலுவலகம் ஆகிய இரண்டும் ஒரே கட்டத்தில் இயங்குவதனால் ஏற்படும் இட நெருக்கடியினாலும், இதனால் அங்கு வரும் பொதுமக்களுக்கு ஏற்படும் அசெளகரியங்களையும் கருத்தில் கொண்டு, உடுமலைப்பேட்டை வருவாய் கோட்டத்திற்கென கோட்டாட்சியர் அலுவலகம்  அமைப்பதற்காக உடுமலைப்பேட்டையில் நிலம் தேர்வு செய்யப்பட்டு, 1 கோடியே 85 லட்சத்து 61 ஆயிரம் ரூபாய் செலவில் புதியதாக வருவாய் அலுவலகம் கட்ட மாண்புமிகு முதல்வர் அவர்கள் உத்தரவிட்டுள்ளார்.

-இணைய செய்தியாளர் - ஈஸ்வரன்

புதைக்கப்படுகிறது புரட்சி?

   பல்வேறு தடைகளைத் தாண்டி, இடையறா போராட்டங்கள் மூலம் ஒரு யுகப்புரட்சியை முன்னெடுத்ததால் ஏற்பட்ட உச்சக்கட்ட மனக்களைப்பு. ஆட்சியாளராக ஒரு நாளைக்கு பதினாறு மணி நேர கடும் உழைப்பு. புரட்சிக்கு முன்பாக உள்நாட்டுப் போர்களில் பங்கெடுத்ததால் ஏற்பட்ட உடல்நலக் குறைபாடுகள். பலமுறை இவர் மீது பிரயோகிக்கப்பட்ட கொலைமுயற்சிகள். அதுபோன்ற ஒரு முயற்சியின் போது இவரது தொண்டையில் சிக்கிய துப்பா

க்கிக் குண்டு. அதை நீக்க ஓர் அறுவைச் சிகிச்சை. இன்னும் ஏராளமான காரணங்கள். புரட்சி மூலமாக 1917ல் ஆட்சிக்கு வந்த லெனினின் உடல், அடுத்தடுத்த ஆண்டுகளில் தொடர்ச்சியாக சீர்குலைவு அடைந்துகொண்டே போனதில் ஆச்சரியம் எதுவுமில்லை.

1924 ஜனவரி 21 அன்று தனது ஐம்பத்து மூன்றாவது வயதில் லெனின் காலமானார். ‘நியூரோசிபிலிஸ்’ எனப்படும் நரம்பு மண்டலம் தொடர்பான பிரச்சினைகளே அவரது மறைவுக்கு காரணமென்று மருத்துவர்களால் சொல்லப்பட்டது. லெனின் மறைந்தபோது ரஷ்யப்புரட்சியை கடுமையாக எதிர்த்தவரும், லெனினின் எதிரியாக கருதப்பட்டவருமான பிரிட்டிஷ் தலைவர் வின்ஸ்டன் சர்ச்சிலின் அஞ்சலி சுவாரஸ்யமானது. ‘ரஷ்யர்களின் துரதிர்ஷ்டம் லெனினின் பிறப்பு. அதைவிட மோசமான படுமோசமான துரதிர்ஷ்டம் அவருடைய இறப்பு’. சம்பிரதாயத்துக்காகச் சொல்லாமல், சர்வநிச்சயமாக சொல்லலாம். ரஷ்யர்களுக்கு ஈடு செய்ய முடியாத இழப்பு லெனின்.

எனவேதான் அவரது உடலைப் புதைக்க அப்போதிருந்த ரஷ்ய கம்யூனிஸ்ட் கட்சித் தலைவர்களுக்கு மனமில்லை. எதிர்கால விஞ்ஞான வளர்ச்சியில் எது வேண்டுமானாலும் சாத்தியமாகலாம் என்று கூறி, லெனினின் உடலைப் பதப்படுத்தி பாதுகாக்க முடிவெடுத்தார்கள். ஒருவேளை இறந்தவர்களை உயிர்ப்பிக்கும் தொழில்நுட்பம் வருமேயானால், லெனினை உயிர்ப்பிக்க வைக்கலாம் என்றுகூட அவர்கள் நம்பியிருக்கலாம்.

மூன்று நாட்கள் லெனினின் உடல் பொதுமக்கள் பார்வைக்காக வைக்கப்பட்டது. பத்து லட்சம் பேர் அஞ்சலி செலுத்திய பிறகு, அவரது உடல் பதப்படுத்தப்பட்டு நிரந்தரக் காட்சியாக மாஸ்கோவின் செஞ்சதுக்கத்தில் நிலைநிறுத்தப்பட்டது. அந்த இடத்துக்கு லெனின் மாஸோலியம் என்று பெயர் சூட்டப்பட்டது. ‘மாஸோலியம்’ என்றால் கல்லறை என்று பொருள். அதற்குப் பிறகு கிட்டத்தட்ட தொண்ணூறு ஆண்டுகளாக பல கோடி உள்நாட்டு, வெளிநாட்டு மக்கள் லெனினின் உடலைப் பார்வையிட்டு அஞ்சலி செலுத்தி வருகிறார்கள். ரஷ்யாவில் நாத்திகம் ஒரு மதமாகவே நிலைநின்று விட்டாலும், கிறிஸ்தவ ஆதிக்கத்துக்கு செல்வாக்கு அதிகம். அவ்வப்போது கிறிஸ்தவ குருமார்கள் லெனின் உடல் முறையாக அடக்கம் செய்யப்படாதது குறித்து முணுமுணுத்தாலும், வெளிப்படையாக குரல் கொடுக்க தைரியமின்றி கிடந்தார்கள்.

1989ம் ஆண்டு ரஷ்ய பாராளுமன்றத்தில் அமைச்சர் ஒருவர், ‘லெனின் தனது உடலை தனது தாயாரின் சமாதிக்கருகில் புதைக்க வேண்டும் என்று விரும்பினார். எனவே செஞ்சதுக்கத்தில் இருக்கும் அவரது உடலை செயிண்ட் பீட்டஸ்பர்க்கில் புதைக்க வேண்டும்’ என்று சொன்னார். நாடு முழுக்க அவருக்கு கடுமையான எதிர்ப்பு கிளம்பியது.

1990ம் ஆண்டு லெனினால் உருவாக்கப்பட்ட சோவியத் ரஷ்யக் கூட்டமைப்பு (யு.எஸ்.எஸ்.ஆர்.) சிதறியது. ‘கம்யூனிஸம் தோற்றுவிட்டது’ என்று கூறி, ரஷ்யப் புரட்சியின் அடையாளங்களாக இருந்த நினைவுச்சின்னங்கள் பலவும் அப்போது அழிக்கப்பட்டன. பொதுமக்களே இந்த அழிப்புப் பணியில் ஆர்வமாக இருந்தார்கள். ரஷ்யாவின் அசைக்க முடியாத சர்வாதிகாரியாக திகழ்ந்த ஸ்டாலினின் சிலைகள் அடித்து நொறுக்கப்பட்டன. ஆனால் அப்போதும் கூட லெனினின் உடலை அடக்கம் செய்வது குறித்து யாரும் நினைத்துப் பார்க்கக்கூட இல்லை. ஏனெனில் ரஷ்யர்களிடம் அவருக்கு இருந்த இமேஜ் அந்தளவுக்கு அசைக்க முடியாததாக இருந்தது.

காலம் ஓடிக்கொண்டிருக்கிறது. எழுபதுகளிலும், எண்பதுகளிலும் பிறந்து வளர்ந்த தலைமுறைக்கு முந்தைய தலைமுறை மாதிரி பெரியளவில் ‘லெனின் சென்டிமெண்ட்’ இப்போது இல்லை. இந்தச் சூழலைப் புரிந்துகொண்ட மிக்கேல் கோர்ப்பச்சேவ் (சோவியத் ரஷ்யா சிதறக் காரணமாக இருந்தவர்) சில ஆண்டுகளுக்கு முன்பாக, யாரும் பேச விரும்பாத இந்த விஷயத்தை பேசத் தொடங்கினார். ‘புதைந்துபோன விஷயங்களைத் தோண்டியெடுக்கும் நிலையில் நாம் இப்போது இல்லை. இன்னமும் லெனின் உடலை நாம் பதப்படுத்தி, பாதுகாத்துக் கொண்டிருப்பதில் அர்த்தமேயில்லை. அவரது குடும்பத்தினர் விரும்பியபடி முறையாக மரியாதை செய்து அவரது உடலை அடக்கம் செய்ய வேண்டிய காலம் வந்துவிட்டது’ என்றார்.

கோர்ப்பச்சேவின் இந்தப் பேச்சுக்கு கம்யூனிஸ்ட் ஆதரவாளர்களிடமிருந்து கடுமையான எதிர்ப்பு கிளம்பத் தொடங்கியபோதிலும், அவரது கருத்துக்கும் நிறைய பேர் ஆதரவு தெரிவிக்கத் தொடங்கினார்கள். கிட்டத்தட்ட நான்கைந்து காலமாக எதிரும் புதிருமாக வரிந்து கட்டிக்கொண்டு ரஷ்யர்கள் இந்த விஷயத்தை விவாதித்து வருகிறார்கள். ரஷ்ய ஆளுங்கட்சி இந்த விவகாரத்தை முள் மேல் பட்ட சேலையாக மிகக் கவனமாக கையாண்டு வருகிறது. அதே நேரம் லெனினின் உடல் புதைக்கப்பட வேண்டும் என்கிற மனவோட்டத்தை மக்களிடம் ஏற்படுத்தும் பணிகளையும் மறைமுகமாக செய்துவந்தது. கடந்த ஆண்டு லெனினின் உடலைப் புதைக்கலாமா என்று மக்களிடம் கருத்துகோரி ‘குட் பை லெனின்’ என்கிற இணையதளத்தை கூட உருவாக்கி இருந்தது.

மூன்றாவது முறையாக விளாதிமீர் புடின் ரஷ்ய அதிபராகிவிட்ட நிலையில் மீண்டும் ‘லெனின் உடல் புதைப்பு’ விவகாரத்தை தீவிரமாக்கியிருக்கிறார். குட்டியை விட்டு ஆழம் பார்ப்பது போல சில நாட்களுக்கு முன்பாக புடினுக்கு நெருக்கமானவரும், ரஷ்ய கலாச்சார அமைச்சருமான விளாதிமீர் மெடின்ஸ்கியை வைத்து ஒரு கருத்து கூற வைத்திருக்கிறார்.

‘லெனினின் உடல் இத்தனை காலமாக அடக்கம் செய்யப்படாமல் இருப்பது அபத்தமானது. மரியாதைக்குரிய தலைவரான அவரது உடல் அரசு மரியாதையோடு அடக்கம் செய்யப்பட வேண்டும். தனது உடல் எளிமையான முறையில் அடக்கம் செய்யப்பட வேண்டுமென்பது அவரது கடைசி ஆசை. அதைக்கூட இத்தனை ஆண்டுகளாக நாம் செய்யாமல் இருப்பது வெட்கத்துக்குரியது. தற்போது அவரது உடல் வைக்கப்பட்டிருக்கும் இடத்தை சோவியத் வரலாற்று நினைவிடமாக மாற்றிவிடலாம்’ என்று ரஷ்ய வானொலிக்கு அளித்த பேட்டி ஒன்றில் பொரிந்து தள்ளியிருக்கிறார் மெடின்ஸ்கி.

முன்பு 89ல் லெனின் உடலை அடக்கம் செய்வது தொடர்பாக அமைச்சர் ஒருவர் பேசியபோது எழுந்த கடும் எதிர்ப்பெல்லாம் இப்போது இல்லை. மாறாக இணையதளத்தில் எடுக்கப்பட்ட கணக்கெடுப்பில் 56 சதவிகிதம் பேர் லெனினின் உடல் அடக்கம் செய்யப்பட வேண்டும் என்றே கருத்து தெரிவித்திருக்கிறார்கள். முந்தையக் கணக்கெடுப்பில் 48 சதவிகிதம் பேர் இக்கருத்துக்கு ஆதரவு தெரிவித்திருக்கிறார்கள். வருடா வருடம் லெனினின் உடலை அடக்கம் செய்ய வேண்டும் என்கிற கருத்துக்கு ரஷ்யர்களிடையே ஆதரவு பெருகி வருகிறது. நடப்பு நிலவரத்தைப் பார்த்தால் விரைவில் லெனினின் உடல் அடக்கம், செயிண்ட் பீட்டர்ஸ்பர்க்கில் அவரது தாயாரின் சமாதிக்கருகே நடக்கும் என்றுதான் தெரிகிறது.

இந்த விவகாரங்கள் சூடு பிடிப்பதற்கு முன்பாக ரஷ்ய கம்யூனிஸ்ட் கட்சி தன் கவலையை தெரிவித்திருந்தது. ‘சோவியத்தின் வரலாற்றை மாற்றி எழுத நினைக்கிறார்கள். புரட்சித் தலைவர் லெனினின் நினைவுகளை மக்கள் மனதில் இருந்து முற்றிலுமாக அகற்ற நினைக்கிறார்கள்’ என்று அக்கட்சி கருத்து தெரிவித்திருந்தது.

புரட்சியைப் புதைக்க முடியுமா என்கிற கேள்விக்கு காலம்தான் விடையளிக்க வேண்டும்.

-இணைய செய்தியாளர் - குருஜி

இன்றைய தலைமுறை

கல்வி மற்றும் மருத்தும் இலவசமாக்கப்படவேண்டும் ! விவசாயம் முன்ணுரிமை படுத்தவேண்டும் ! சுற்றுசூழல் பாதுகாக்கபட வேண்டும் ! லஞ்சம், ஊழல், திருட்டு, கொள்ளை, கொலை ஒழிக்கப்பட வேண்டும் என்றால் ? அடுத்த தலைமுறையினரை பற்றி சிந்திப்பவர்களே தலைவர்களாகவும், சட்டமன்ற உறுப்பினர்களாகவும், முதலமைச்சராகவும் வரவேண்டும் - இருக்கவேண்டும் ! இதை இன்றைய தலைமுறையினர் அவசரமாக சிந்தித்து முடிவுவெடுக்கவேண்டும்

          இவை எங்கிருந்து தொடங்க வேண்டும் ? வார்டு உறுப்பினர்கள் முதல்  தொடங்கி பஞ்சாயத்து தலைவர்கள், கவுன்சிலர்கள், நகராட்சி - மாநகராட்சி உறுப்பினர்கள், சட்டமன்ற உறுப்பினர்கள், முதலமைச்சர் வரை தங்கள் பகுதியில் யார் தகுதியானவர்கள் என்று சிந்தித்து முடிவு எடுத்து தேர்ந்தெடுக்கப்படவேண்டும் இல்லையேல் அடுத்த தலைமுறை !

(ஆட்சி முறை) ?        

-பசுமை நாயகன்